求驗客手記:曼聯hea拜早年華西慘變「財7」

求驗客手記:曼聯hea拜早年
華西慘變「財7」

今日係年三十,我求大俠預祝各位讀者雞年心想事成。為咗中國市場,好多歐洲球會都各出其謀向中國球迷拜年,大部份不外乎寫吓揮春、講吓普通話咁,而曼聯就似乎最慳水慳力同埋好怪囉。
曼聯搵咗桑馬達、安達靴里拉、卡域克同埋路爾華倫西亞嚟玩個波衫砌字。馬達第一個出場,着咗件上面寫住「恭」,下面寫住「2」嘅波衫。卡域克嗰件就係寫住「喜」同「0」。相信聰明嘅讀者都估到,佢哋係想砌「恭喜發財」同「2017」出嚟。不過,感覺怪怪地囉,因為佢哋逐個出場,最尾又唔會企番埋一齊,同埋逐個咁睇,見到佢哋背脊寫住「恭2」、「喜0」、「發1」,都真係唔知想噏乜。最無奈嘅都係華西,做番七號仔,叫做「財7」。佢拍片嗰陣都毫無笑容,好似想快啲收工咁,唔通佢都知自己好……另外,之前有傳曼聯隊長朗尼會去中超,但噚日上海足協竟然出嚟幫球會闢謠,話上港同申花今月都唔會再簽外援。
講吓其他球隊啦,阿仙奴搵咗禾確特、哥斯尼同梅斯達菲貼揮春同派利是,而車路士就派出大衛雷斯同韋利安等寫揮春,都寫得唔錯㗎,至於國際米蘭同拜仁慕尼黑都係玩寫揮春,莫路伊卡迪、紐亞同湯馬士梅拿都即席揮毫,靚唔靚就見仁見智嘞。

齋睇背影認唔認到佢哋呢?我求大俠話你知,「恭2」係馬達,「喜0」係卡域克,「發1」係靴里拉,而「財7」就係華西。

大衛雷斯(右)學寫揮春,向中國球迷拜年。互聯網

禾確特(左)派利是,哥斯尼(右)好有禮貌,收到嗰陣有講「些些」㗎。互聯網

阿仙奴大派利是

尼斯就有啲新意,搵球員扮唔同親戚拍片,喺片中問你幾時會買樓、家陣每個月搵幾多、考試考成點之類拜年嗰陣啲三姑六婆必問嘅問題,其中巴洛迪利就負責問:「你有對象未呀?幾時帶佢返屋企呀?」真係畀大家預習定年初一會面對嘅困境。

維拉用繁體字最有心

唉,聽嚟聽去都係普通話,睇嚟睇去都係簡體字,作為香港球迷,真係有啲被忽略嘅感覺。好在,我哋仲有阿士東維拉。維拉雖然降咗落英冠,但佢係少有用繁體字同大家拜年嘅歐洲球隊,喺facebook度祝大家雞年吉祥(圖)。維拉一直都好有香港人心,前兩年都有搵球員用廣東話拜年,唔知佢哋今年會唔會呢?