林保怡與周家怡去年為ViuTV主演的開台劇《瑪嘉烈與大衛系列 綠豆》叫好叫座，這對舊情人就趁今日年三十晚團聚，上演《瑪嘉烈與大衛之團年》，齊齊學「做雞」迎接雞年。
「劇集深入民心」
家怡與保怡因合作《瑪嘉烈》成為好友，亦有一定默契，會否期望新一年再有合作機會？保怡說：「一定會，我哋會同兩位好前衞、思想好開放嘅導演25同FatBall合作，喺2017年做電視劇同電影，其實係做緊嘅，我哋係寫緊劇本……我哋好想將瑪嘉烈與大衛嗰個演法，呈現喺電視或電影上面，睇到大家更加夭心夭肺。」據悉保怡與家怡團隊有意將劇集賣給5月開台的奇妙電視，保怡未有否認，他說：「呢樣嘢真係未知，交畀佢哋（團隊其他人）傾緊。」二人分分鐘有機會掉轉槍頭，幫奇妙撼ViuTV。
ViuTV今年再開拍《瑪嘉烈與大衛系列 前度》，僅廖碧兒有得留低，會否覺得唔開心？保怡說：「如果我係ViuTV，如果我要拍番《瑪嘉烈》，我搵邊個演員都係我個right，掉番轉頭我哋演員要順從或者配合番個遊戲，人哋唔搵你冇嘢㗎，希望佢哋收視再創高峯。我都想睇㗎，呢個世界冇話冇咗邊個唔得，我哋都做咗一個好獨一無二嘅瑪嘉烈同大衛，可能前度嘅瑪嘉烈同大衛會更加精采呢。」家怡則說：「劇集已深入民心，如果再擺番我哋落去做其他角色會好奇怪。」
保怡：手感好正
訪問當日保怡和家怡跟餐廳老闆娘兼形象指導杜貞貞學整啤酒雞，保怡帶住手套醃雞，貌似當年他在《妙手仁心》的醫生造型，期間保怡還忍不住哼起《妙手仁心》主題音樂。
原來啤酒雞要早一晚醃，又要以橄欖油搽勻雞皮，猶如為肥雞做按摩，保怡邊按摩邊笑住說：「手感好正。」待醃好後，將雞放在燒雞企架內，旁邊放上雜菜及加上啤酒，放入焗爐以180度焗25分鐘，到最後5分鐘再加大火力便大功告成。
採訪：魯吉
攝影：仇志德
場地提供：TT Party Party
服裝提供：Shanghai Tang、Ballin（周家怡）