呢個星期唔係國際足協法定國際賽比賽日，但都有場重量級戲碼，巴西喺周三主場迎戰哥倫比亞。上年11月發生涉及大量查比高恩斯職球員遇難嘅空難慘劇，呢場波目的係要為死難者家屬進行籌款，總共籌得30萬鎊（約295萬港元）。
三名生還者現身球場
呢次空難喺飛機上77人只有六人生還，其中四人，包括三名查比球員希里奧尼圖、阿倫路舒曹以及不幸要截肢嘅科文，都有嚟到位於里約熱內盧嘅奧運球場。稍為遺憾嘅係場波嘅反應唔算熱烈（下圖），可以容納45,000人嘅球場，門票銷情唔多理想，只有大約19,000人入座。
最近歐洲聯賽正打到如火如荼，所以今次兩大南美勁旅碰頭，雙方陣容都係以喺本土效力球員為主，主隊巴西有久違咗嘅羅賓奴；至於哥倫比亞班球員就更加名不經傳。場波由效力彭美拉斯嘅前鋒杜度，喺下半場攻入全場唯一入球，助巴西以1:0小勝哥倫比亞。