今日係年三十晚，亦都係年宵最後一日，4位特首參選人，3位噚日都去咗年宵，兩位支持度較高的曾俊華同胡國興，梗係落去維園騷quali啦，證明自己有幾super popular嘛。葉劉淑儀就去咗長沙灣年宵市場，提高安全系數。噚日上庭做證人嘅奶媽林鄭冇去年宵，改為同好朋友、親西環嘅新家園顧問委員余秀珠，去探訪單親家庭，仲同單親家庭團年過節。
葉劉避戰 轉攻長沙灣
曾俊華噚日中午同阿仔曾雕龍去維園年宵，大批市民上前要求同佢合照、握手，曾俊華來者不拒，更有人叫佢做「行政長官」，祝佢一定成功。鬍鬚曾參觀部份年輕人開設的攤檔傾吓偈，做吓騷關心吓年輕人都要嘅。佢話自己其實年年行花市，只係以往冇咁多記者採訪佢。
胡國興之後亦去到維園，先後到訪工黨、公民黨嘅攤位，李卓人同余若薇兩人對胡官好客氣，工黨何秀蘭寫咗「公平公正、以民為本」揮春畀胡，余則寫咗「入閘無分先後，起跑同一線上」嘅對聯畀胡。咁係咪會提名畀胡國興？余冇正面回應，只係話希望多啲候選人入到閘，而《100毛》攤位負責人林日曦向胡寫上一張「入閘平安」的揮春，唔知係咪知胡官架車俾人撞，腦細擔心佢嘅安危呢？
葉劉就去咗長沙灣年宵市場使咗1,200元買花，其間都有市民同葉太合照。點解去長沙灣？葉劉話因為有環保主題喎。
八方猴年收爐，大年初五開工，祝讀者新春大吉，雞年有運行。
李八方