周三NBA常規賽，勒邦占士（LeBron James）、安東尼（Carmelo Anthony）同獲迪（Dwyane Wade）三位喺2003年選秀出身嘅球星好友，齊變落難兄弟！騎士喺2017年戰績麻麻，占士近日就不斷向球隊施壓，希望管理層可以搵個有組織能力嘅球員嚟幫手；呢日雖然佢交出「大三元」24分11助攻13籃板，但騎士打到加時都係以112:116主場輸畀帝王。近日有傳紐約人想用安東尼，向騎士交易路夫（Kevin Love），不過就俾騎士拒絕咗，占士仲話：「你估我哋玩緊Fantasy咩。」而安東尼轟入全場最高嘅30分，但紐約人都係以95:103作客不敵小馬。至於獲迪嘅公牛主場以114:119反輸畀鷹隊，佢喺賽後仲狂鬧班隊友冇爭勝心。