開放式廚房可以增加空間感，但經常煮食的家庭，擔心油煙薰滿屋有氣味，情願廚房獨立，有牆有門分隔。其實動動腦筋，會找到兩全其美的方法，今次單位屬成功示範例子，飯廳廚房拆牆改位，部份空間互換，新造一幅直牆，使出「鑿壁偷光」殺手鐧，沒完全開放，卻令地方變得闊落、睇得通及有透亮效果。
記者：溫潤潔
攝影：馬泉崇
間隔要重整，全因原則呂字廳不合意，戶主覺得飯廳與客廳打對角，兩區分散，廚房在角落，窗細昏暗，問題來自廚房曲尺牆，乾脆拆走冇得留低，兩廳就能相連一起，活動空間較以前多。
靠邊的廚房拉直呈長方形，戶主怕油煙散出廳，拒絕廚房開放式，但又想有開揚感，怎麼辦？新造廚房牆留空部份造黑框玻璃屏，實體上有阻隔，視覺上望得穿，還可引入天然光無侷促，側旁入口暗藏玻璃趟門，日常打開互通，煮食時便關上，想點就點。
戶主喜歡白色為主調，飯廳牆身貼白色磚紋牆紙，廚房鋪白色光面方磚，跟黑框玻璃屏，深淺對比鮮明，醒醒神。客廳電視背造特色牆，鋪砌手工切面木紋地板，粗中有細，加強層次感，木帶來暖意，可一可再，客廳窗邊造木層架，擺放書本及小盆栽，閒時閱讀及賞花，怡情養性，設計細心。全屋徹底翻新，天花、地板、水電、廚廁設備及鋁窗都更換，加上訂造家具等，裝修費逾110萬元。
歡迎讀者提供單位拍攝及介紹，請將資料傳真2370 3886或電郵mailto:[email protected]