特首任期餘下不足半年嘅梁振英，噚日出席任內最後一次商界聯席午餐會，唔知係咪商界知道梁振英多仇口，經常惹來示威者，噚日會展現場保安高度嚴密，記者入場前至少三次被保安查問身份，確保係獲邀人士或傳媒先畀入場。
主持午餐的「梁粉」、廠商會會長李秀恒致辭時，就大讚梁過去5年，帶領香港經歷不少挑戰，指自己作為梁嘅親密朋友，見到梁過去5年來，臉上多咗皺紋同白頭髮，但更有活力。李秀恒又明抽早前話香港要「休養生息」嘅特首參選人曾俊華水，話梁公佈嘅施政報告，內容溫和（mild）又富挑戰性，笑指「maybe mild mean 休養生息」。
梁振英致辭時就話，自己舊年上台發言時，曾經公開多謝商界交稅，話今年同樣要多謝商界，因為政府去年收到嘅利得稅創有紀錄以來嘅新高，說明香港經濟情況唔錯，佢喺最後午餐又不忘唔開名暗寸曾俊華，話無解決問題嘅方法係完美，「但唔做嘢，不是答案（doing nothing is not the answer）」喎。