體壇拾趣：
拿維唔玩入樽賽咁卡達呢？

上屆NBA明星入樽賽，拿維（Zach LaVine）要鬥到「附加樽」先險勝A哥頓（Aaron Gordon）衞冕，唔少球迷都覺得係近年最精采嘅入樽賽。不過大家想睇A哥頓復仇就可能要失望喇，因為拿維計劃割禾青唔玩今屆賽事。

A哥頓復仇無望

拿維同A哥頓上屆分別扮「波神」米高佐敦（Michael Jordan）同「郵差」馬龍（Karl Malone），球迷梗係睇得開心啦。不過，美國傳媒周三就大爆拿維冇打算挑戰三連霸，雖然《ESPN》透露，上屆屈居亞軍嘅A哥頓已經應承出戰，但假如拿維今屆真係唔玩嘅話，咁A哥頓就復仇無望喇。同時，有消息指湖人前鋒蘭斯Jr.（Larry Nance Jr.）同塞爾特人新秀J布朗（Jaylen Brown）都獲邀參加，但佢哋都拒絕出戰，暫時只得馬刺前鋒西蒙斯（Jonathan Simmons）應承參賽。

翻版夢幻入樽賽搞唔成，咁球迷仲想睇啲乜？當然想睇2000年「入樽之王」卡達（Vince Carter）復出啦。卡達喺開季前講到，自己對再次出戰入樽賽好有興趣咁：「我唔知有冇機會贏到，但起碼可以令比賽更有趣。」雖然佢之後澄清番，話自己年紀大，要一日時間準備先做得出當年嘅入樽動作，仲講明唔會再參賽，不過球迷都想喺今屆見到佢囉。卡達喺美國時間周四就滿40歲，但呢位「半人半神」喺周三主場對速龍嘅常規賽入面，仲可以360度轉身上籃，真係寶刀未老㗎。佢今場後備上陣入七分，灰熊以101:99贏波。