潘頓今晚於快活谷全面出擊冷熱照贏，頭場爆冷勝出蘇偉賢馬房「欖球鑽石」後，第三場三班2200米再下一城，以準新郎哥賀賢馬房的「大情人」建功。呢位澳洲殺手用咗短短一粒鐘已經雙喜臨門，率先在猴年送歲賽彈出領先騎師王，「大情人」大熱掄元，單Win及組合獨贏A1分別派35.5及19.5元。
六歲馬「大情人」上仗本月4日跑谷草1800米做二奶，今次匆出仍用潘頓，同羅理雅座騎包尾練馬師高伯新的「康樂神駒」鬥足大半條直路，「康樂神駒」看似後勁較強，好像衝贏，但影相後要放大圖片，才判斷出原來「大情人」險勝一條線，此駒第三季在港出賽終於取得第一Win，潘頓起孖之餘，更助賀賢呢位澳洲同鄉打破新一年齋缽及兩個月頭馬荒，可謂苦盡甘來。在此之前，賀賢係守齋時間最長練馬師，對上一Win已是去年11月23日「順勢寶」。
賀賢表示之前搏殺手風一般，對上一次取勝後，累積約十次亞軍，當「大情人」今仗終點前叮噹頭馬時，都有少許擔心是否又搏失，幸而順利取勝，希望自己真正轉運。賀賢又話「大情人」之前跑了四次亞軍，今場開齋有望令馬兒增強自信心，繼續有好表現。
有人快樂有人愁，「康樂神駒」飛起騎開的杜利萊用羅理雅，羅理雅發揮到一絕，可惜呢匹五歲馬影相輸馬鼻位做阿二，始終打開唔到在港勝門，羅理亦因此繼續保持刑滿復出後不勝。三、四名分別為「實業風采」及「海利多」，四重彩派一萬三千幾。