格列沙加，好心你生性啲啦，唔通想激死雲格咩！阿仙奴中場沙加上場英超因為粗野攔截領紅牌，已經搞到領隊雲格好火，點知佢禮拜一仲走去撩是鬥非，送朋友機嗰陣唔止爆粗鬧航空公司職員，仲講埋種族歧視字眼，搞到要去差館錄口供。
英國傳媒披露，沙加禮拜一晚送佢女朋友嘅兄弟去希斯路機場搭飛機，但佢哋去到機場嗰陣，英航職員話過咗登機時間，唔畀入閘。沙加雖然冇689嘅特權，但有機場阿嬸嘅霸氣，喪鬧英航員工，仲用德文話佢係「死白狗（fxxxing white bxxxh）」。職員之後報警，警方證實因為有航空公司職員被種族歧視，所以請咗沙加返去問話，但就冇起訴到佢。
沙加喺周日對般尼場英超先雙腳飛鏟對手，直接拎紅牌，今季第二次被逐，估唔到一日後就喺場外惹事。雲格之前話會同沙加傾吓喺比賽度控制情緒，唔好亂咁飛鏟，睇怕家陣要教埋佢喺場外點控制自己喇。另外，阿仙奴同車路士周二晚分別有聚餐，但球迷注意到阿仙奴中場奧斯爾無故缺席，唔通大眼仔真係想走？