近排不時有上仗包尾馬再出變第一的神奇個案，這晚（25日）谷草一開場第一場五班1000米即有翻版例子。主角蘇偉賢馬房「欖球鑽石」上次田草1200米包尾，今次仍配潘頓而轉戰谷草五班1000米，結果一放到底打開今季勝門，單Win及組合獨贏A3分別派236及27元正。
六歲馬「欖球鑽石」由欖球團體擁有，團體成員華洋共處，本身上季尾在潘頓胯下贏谷草五班1200米開齋，上賽田草大熱包尾而回，今次回師谷草由熱變冷，開閘應聲彈出，就此由頭帶到尾贏半馬位爆出冷門。
蘇偉賢透露潘頓一早表明想續騎「欖球鑽石」，他便成人之美，今仗11檔起步在C加3跑道比較困難，搶放是一個戰略，很開心馬兒可一放到底。不過蘇偉賢指此駒實力有限，加分後恐怕難以佔優。
今場即爆到七彩，23倍「欖球鑽石」勝出，39倍「天地福星」由蘇狄雄後上跑第二，連贏派三千七百幾蚊，三、四名分別為「飛霞」及「電訊大炮」，四重彩派22萬幾。
另外，今場霍利時馬房24倍馬「快趣的」閘門開啟時起擒，當時韋達身體已移離座騎，整個人留在閘內，「快趣的」卻空馬跑畢全程，韋達冇受傷可繼續餘下賽事，「快趣的」則當輸冇得回水。