呢排對廁紙同八達通應該多番少少認識嘅林鄭月娥（圖），連日拜訪選委拉票，噚日仲推出埋競選網站，有選委話已經收到林鄭2月3日造勢大會嘅邀請；造勢大會完結後，相信進入選戰「真軍期」。
八方聽聞，林鄭喺造勢會翌日，會出席一個非常重要嘅拜票活動，就係民建聯舉辦嘅特首參選人交流會，同該黨核心及選委傾偈談心。嗱嗱嗱，話晒民建聯都係香港愛國愛港陣營第一大黨，若然獲得佢哋支持，聲勢當然非同小可，實際啲睇，佢哋仲手持近百張選委飛，喺選委會入面係大戶，係咪好重要呢？
咁又冇理由，只請林鄭當其他參選人無到咁唔公平啩？八方聽聞，曾俊華、葉劉淑儀同胡國興都獲邀喺之後同民建聯選委座談，之不過呢，頭炮當然係最重要，主角係林鄭，點都有啲意思。