雞年將至，而新一屆立法會入面屬雞嘅人，原來唔係咁多，有民建聯劉國勳同香港眾志羅冠聰；至於上一屆嘅工黨李卓人同民建聯鍾樹根，都踏入60歲嘅花甲之年。議會嫩雞老雞，橫跨唔同世代同政治光譜，共通點好明顯：「雞，全部都係雞！」
生於1981年今年36歲嘅民建聯劉國勳，係議會雞仔之一。原來佢自細都有拜太歲嘅習慣，求個心安理得，以前都係屋企人幫佢拜太歲，𠵱家大個仔又成家立室，知道今年刑太歲，梗係自己做。查實佢太太呂迪明同樣刑太歲，所以會同太太一齊去，透露心水拜太歲地點係北區蓬瀛仙館，亦可以去北帝廟，佢話手續簡單，唔識嘅朋友去到廟問吓人就得喎。
講到雞年願望，佢話老土啲都係嗰句：最緊要身體健康，工作上希望「聞雞起舞」，議會工作有作為，香港搵到個好特首。
立法會最年輕議員香港眾志羅冠聰亦係雞仔，1993年出世嘅佢今年24歲。一入議會就俾梁特以DQ打壓，近期訪台又遇到暴力衝擊，歷盡風浪嘅佢多咗人生體驗，未來應該大個仔，相信喺政界會鶴立雞群。八方暫時未聯絡到佢問雞年願望，唔知會唔會係想贏JR官司？
李卓人：望香港變天
舊年告別議員生涯嘅工黨李卓人就係雞佬，下月中正式邁向60歲花甲之年，但佢嘅心境依然年輕，事關八方問佢使唔使攝吓太歲嘅時候，佢斬釘截鐵咁話：「冇㗎，絕不信邪﹗」佢相信最緊要係大家一齊努力、團結咁去打拼。
講到雞年願望，人哥希望「金雞報變」，事關家陣個政局都幾亂，香港有特首選舉、大陸有十九大、美國又有特朗普上場做總統，所以希望中國同香港都變天，當然係向好嗰邊，朝民主、自由嘅方向變，引用內地維權律師高智晟嘅預言，希望今年共產黨下台。
另一位屬雞嘅前議員係民建聯鍾樹根，佢年紀比人哥細一個月多啲，一樣好快步入花甲之年。可能到咗耳順之年，Tree根深明八方嘅心意，但又唔想多講，所以好委婉咁謙稱，自己經已退出江湖、不問世事，都係唔講咁多，唔通雞年想封嘴變鵪鶉？
李八方
mailto:[email protected]