人民力量前主席袁彌明（Erica）創辦嘅「彌明生活百貨」申請上市，華華噚日下晝，即刻走去佢其中一間喺銅鑼灣嘅舖頭八卦，門市面積唔大，客仔多數係OL或者阿太，冇乜學生哥。
鬼咩，佢呢度賣嘅護膚化妝品同保健食品，閒閒地要幾百至過千蚊，最平可能係一枝細化妝掃，承惠140蚊，一支唇膏都要300蚊，價錢拍得住大品牌，應該唔係普通學生負擔得到。
店員見華華冇幫襯之意，前來解釋一番，指店內部份品牌係香港獨家分銷，大部份產品來自美國、澳洲、西班牙等地，標榜「有機產品（organic product）」，仲話係物有所值喎。值唔值係好主觀，不過袁彌明可以慳番宣傳費就真嘅。