兩大特首熱門人選林鄭月娥同曾俊華，無論政綱同班底，至今都欠奉，令到選委若要以班底揀特首都好難，而以立法會議員身份而自動有一票嘅民建聯蔣麗芸（圖），就比較關注下屆政府嘅架構，覺得同施政成敗都好有關係，其中嘅建議係畀佢嘅黨友、民政事務局局長劉江華做番天職：垃圾桶！
佢話𠵱家嘅街道清潔、垃圾等問題，都係由食物及衞生局轄下嘅食環署負責，覺得都唔係咁好，佢話最好係用番當年市政局嘅做法，即係交畀18區民政署去做，咁就可以回歸番由地區處理，各區梗係會肉緊當區嘅垃圾問題啦。
喺元秋呢個建議下，負責官員會由食衞局局長高永文變民政事務局局長劉江華，佢被網民諷刺為「垃圾桶」，即係要佢名正言順搞垃圾？元秋笑笑口話係啦，唔知有冇特首候選人會將此建議列入政綱呢？