轉會市場下周就關閉，皇家馬德里、巴塞隆拿、拜仁慕尼黑呢啲豪門都冇出手，英超都係中下游球隊擴軍多，全世界都好似圍住中國嚟轉咁，奧斯卡杜斯山度士、泰維斯、韋素等相繼報到。話時話，陸續有頂級外援加盟中超球隊，中國球市就梗係興旺啦，但無可否認亦影響中國球員，特別係小將嘅上陣機會，而中國足協已經加咗制度去限制外援。其實中國足協參考英超過去發展，亦了解到自己未來去向。畢竟英超越嚟越富有，頂級外援越嚟越多，但英格蘭國家隊成績就徘徊喺歐洲一線尾二線頭。
曼城領隊哥迪奧拿近期飽受炮轟，包括起用「黃大仙」門將哥迪奧巴禾、控球戰術過時等，不過佢敢於起用年輕球員就確實值得一讚。哥帥近期眼見英超小將苦無機會，就公開提倡英超球隊可以學西班牙等青訓出色嘅聯賽，容許組成B隊喺低組別聯賽角逐。佢話𠵱家畀英超年輕球員上陣嘅預備組聯賽水準太參差，相反如果B隊可以喺英乙、英甲，甚至英冠角逐，競爭水平提高，觀眾亦多，對球員成長好有幫助。其實幾年前都有人提出過類似建議，不過習慣故步自封嘅英超同英足總當然闊佬懶理啦。
曼城呢期水準不穩，一月加盟嘅19歲巴西前鋒捷西斯加比爾，相信係藍月下半季焦點新人；佢上仗對熱刺後備處子登場都有板有眼，如果個入波唔係越位在先，仲會幫球隊奠勝㖭。佢係唔係新尼馬就言之過早，但以佢踢法，相信會帶嚟唔少衝擊，特別加埋奇雲迪布尼、史達寧、利萊辛尼等快馬，邊個可以抹煞佢哋後上奪標嘅機會？文：牽牛