唔理年頭抑或年尾，雷神莫雷拉如冇馬贏都算係馬場大新聞。今晚谷草雷神頭四場交白卷後冇有怕，第五場四班一哩，上次佢一騎即開齋的新勝馬「綽綽有餘」，今場大熱連捷，單Win及組合獨贏A1分別派22及16.5元。雷神連續第35次賽事贏馬（由去年9月25日沙田日賽開始）未斷纜，再創香港騎師紀錄。
方嘉柏馬房五歲賽駒「綽綽有餘」上仗田草四班1600米，馬兒趴低身撞閘略為偷步而出，雷神失平衡出閘即跌咗條馬鞭，拉士佢只係用手掌拍打座騎仍勝，人馬首次合作即勝出漂亮一仗。今晚「綽綽有餘」匆出移師谷草一哩，出閘再冇問題，沿途居中，直路雷神一騎已透出拋離對手贏2.25馬位輕鬆連捷，方嘉柏亦告連勝三期共取七Win，保持戰績回升的好氣勢。
今場大冧巴輕磅馬天下，9號「綽綽有餘」、10號「沙角威龍」、8號「勁勇威龍」及12號「敬無極」，順序組成四重彩，每注派一萬五千幾。
另一方面，與娛圈人士相熟的馬主胡偉林，今場有新勝的愛駒「領航大師」列陣，兩女藝人郭少芸、周家怡姊妹裝俱黑衫黑褲黑皮鞋到場，為「領航大師」打氣，文頌嫻、洪天明夫婦、梁靖琪等亦有現身，可惜馬兒今仗表現下滑，只得第八名，兩人無緣拉頭馬。