特首戰士在電台揚言自己「喜歡玩時裝」，教人為她提心吊膽，想奉勸「好人好者乜搵的咁嘢嚟玩」又毫無門路，急得我原地打轉。勿以為時裝就像尼姑頭，打個哈哈講一句「和尚動得，我動不得？」便可以摸個不亦樂乎，精神向阿Q看齊是不夠的，一介師奶姿色稍欠高度嚴重不足，不知天高地厚掛住玩，因住隨時被時裝玩番轉頭啊吓，請看看通街通巷那些反面教材，例子恕不一一。何況，富家小姐Rock住去巴黎活動筋骨冇你份，楊凡在戲院大堂伴實譚燕玉鄧達智親密合照冇你份，劉培基應邀到息影女星嘉玲曼谷府上晚宴更加冇你份，前後左右一個擲地作金石聲的人肉名牌都冇，點玩啊？尖不甩的藍色短靴絕對不是百老匯熱賣的Kinky Boots，南施仙納杜拉許多許多年前已經唱到家喻戶曉，「這雙靴用來行路」㗎咋，煞有介事擺上枱當呈堂證物，連隔籬村阿娥都會揞住半邊嘴笑你唔知碇。
看似有錦上添花義務的遮體之物，很多時候適得其反，出賣消費者的品味事小，暴露他們的性格缺憾事大，譬如剛剛看的一部法國動畫片《紅海龜》，畫工出眾色彩美麗，偏偏就遭人物的穿着壞了大事。《魯賓遜漂流記》式的故事，男主人翁海難隻身困於孤島，人又冇物又冇，情節發展下去，美女從海龜遺體破殼而出完全沒有困難接受，但島上既無布料亦無針線，巧婦難為無米炊，他們的衣服究竟從何而來？更離譜的是，九個月後產下嬌兒，小子那條神奇三個骨褲居然有本事隨身軀一齊長大，幾乎荒誕過侵伯食生菜。說話可以亂講，衫褲鞋襪唔可以亂着，此之謂也。