有人辭官歸故里，亦有人漏夜趕科場，有球員爭住入豪門，但亦有唔少喺豪門坐冷板嘅球員趕住走，希望去中小型班打正選。作為曼聯球迷，見到舒尼達連今個月轉投愛華頓，心入面都百感交集，因為小弟一直覺得佢係好球員，但喺曼聯總係上唔到位。對曼聯嚟講，佢係雞肋，但出到去其他球會，佢有力打番當年喺修咸頓嗰陣嘅英超頂級中場水準，所以既可惜，又無奈。
三年前，修咸頓條中場線係雲耶馬拍舒尼達連，佢哋真係中場鐵閘一樣，兩個防守都好好，掃晒啲波，而舒尼達連比雲耶馬強嘅係，仲有控制節奏、放長波嘅能力。2015年夏天，曼聯用2,000幾萬鎊就買咗舒尼達連返嚟，真係幾抵㗎，加埋同一個夏天嚟嘅舒韋恩史迪加（小豬），小弟嗰陣真係覺得曼聯防中問題已經完全解決，唔使再擔心卡域克接班人嘅問題，前途一片光明。點知，卡域克嘅即時替代者小豬同埋長遠代替者舒尼達連都唔啱摩連奴心水，家陣仲係冇人取代到卡域克嘅位置。想當年曼聯話搵堅尼接班人，搵咗好耐都未搵到，不經不覺就已經要搵史高斯接班人；史高斯接班人仲未搵到，卡域克都就嚟掛靴。
講番舒尼達連，可能喺曼聯冇穩定上陣時間，同埋壓力大，所以踢唔番修咸頓嗰陣嘅水準。愛華頓係個幾好嘅平台，一來壓力冇曼聯咁大，二來領隊係前修頓主帥朗奴高文，好熟悉佢嘅風格，三來愛華頓中場指揮官巴利都年紀大，係時候退落嚟，正好畀舒尼達連上位。相比喺曼聯要處理好多防務，佢喺愛華頓有伊祖沙古爾幫手，可以放更多心機喺進攻度。
文：咖喱