香港賽馬會今年繼續參加年初一晚新春花車匯演，今年隨花車巡遊同市民拜年嘅有唔少市民畀like、攞到2015/16年度「告東尼獎」同「最受歡迎騎師」獎項嘅馬會見習騎師蔣嘉琦。
今年係嘉琦BB第二次參加馬會花車巡遊，對上一次喺四、五年前，以見習學員身份與其他學員一齊參加。23歲嘅嘉琦BB話呀，小學時都會同家人朋友喺現場睇花車，今年成為花車上其中一位主角，實在好興奮。佢自爆新年小趣事，話屋企人有個習慣，會喺初一大玩估四字詞語遊戲，主要係猜成語，好開心㗎。
馬會花車巡遊隊伍除咗以「躍馬亮影迎新歲」為主題嘅花車，仲有青協「舞導館」嘅舞者朱穎賢（Kimmy）連同其他19人大跳Hip-hop。