特首選情奇詭開局，泛民手握325票，不急表態，等兩位面左左政壇老手自揭底牌，臨尾才決定點樣策略性落注不遲。
係呀，當落注，一場娛樂而已，認真你就輸。邊個當選，邊個都係阿爺頭馬，一經神一般的感召，乜馬都要在習帝面前跪低，只爭在跪低時的姿勢，一個勁樣衰，一個無咁肉酸而已。
七百三十萬非選民，奄尖離地那些唔計，就算食過87枚催淚彈的市民，都唔急。因為選特首這台爛戲，戲碼只得一種，無法轉mode，乾脆食花生睇騷。fb 可以like嬲任畀，只要唔上頭，唔影響家庭和諧就得。
那些以粗口問候定含淚投票論者（幸暫時未見有此重口味建議），小聲點，局勢未明，粗口動詞都要與時並進嘛。現階段追打誓要擲奶嘴落海者，也要克制，選情忽然大逆轉，是不需要「另類事實」的，人在hea做，習帝在看啊。再講，鄭營撬角，挖過來不少是鬍鬚的針，內應外合，小明孤注一擲，隨時敗走西營盤過唔到雞年。故意唔去春節酒會打卡聽風采依然的訓話的大叔，耍拳磨劍，指住那些叫價過千萬的墨寶笑問助手：故宮展覽，你估大師佢有冇份呢？