女將蔣嘉琦雖然受到馬迷愛戴，但現實點說，嘉琦的騎功始終同一流大師傅有一段距離，所以一啲嘉琦搏唔贏嘅馬，如果換上頂級好手，當然有留意價值。
好似周三(25日)快活谷第六場四班1200米的「志友運」，上仗谷草1000米抽4檔，但鞍上人嘉琦似乎逼唔出隻馬嘅前速，最終姍姍來遲梗頸四，只輸一馬位。今次飛起嘉琦而寧願負133磅初配潘頓，明顯馬房認為騎功嘅因素，遠比見習生減磅重要。
「志友運」今朝亦有動靜，此駒操練前後，練馬師姚本輝在機坪欄邊吼到實，非常緊張，此駒步往內圈踱步前，亦見輝哥指手劃腳，向鞍上人給予操練指示，可謂盡露搏殺手影。
睇番「志友運」今季曾分別喺陣上擊敗「首映」及「海翡翠」，其中「首映」之後兩捷喺三班亦大勝，而「海翡翠」之後更贏三場並攻陷二班賽，咁你話「志友運」仍喺四班跑，係咪超到暈呢？