雖然已經名草有主，兼且求婚成功，稍後同女友拉埋天窗，但公民黨黨魁楊岳橋（AY）似乎無因此流失女粉絲支持，前晚喺公民黨嘅年宵攤檔外，唔少岳迷等住同佢影相。為乜突然做咗人肉佈景板？原來係為咗個黨籌旗。
被問是否真結婚
AY前晚喺北角搞咗個同社區安老有關嘅社區放映會後，殺入維園年宵於公民黨攤檔幫手。佢日前都試過坐定定為市民寫揮春義賣，噚晚則搞搞新意思，市民只要付出38蚊，就可以同佢影張即影即有，據知反應好好，約近一個鐘已經籌到二千零蚊，平均影咗50幾張相。而影相嘅市民中，一如所料，女多過男，據聞有女粉絲都問AY，係咪真係結婚㗎？唔知係難以置信定係唔肯相信？
八方問過AY，佢笑稱作為黨魁，為黨籌旗義不容辭，「我冇腿、冇樣，惟有賣身，賣得就賣。」對於有市民恭喜佢即將脫離單身行列，對戀情一向低調嘅佢就話，多謝大家有心，又強調影相者中，有男有女，唔係淨係女，其中仲有市民話唔識佢㗎，係屋企人話：「呢個人好重要」，所以先同佢影相。
李八方
mailto:[email protected]