【本報訊】街市中人愛稱她做「靚姐」，靚姐總笑口常開，口中個個都是老友記，說的就是雞販玲姐。在九龍城街市，玲姐是個明星，由全港殺雞到點煮雞最好味，凡是關於雞的新聞，電視台和報章雜誌記者總是第一時間訪問她，「問到咪講兩句囉」。
「過年冇雞食點得？」
橙色毛衣配襯閃亮頭飾和耳環，連腳踏的水鞋都七彩繽紛。「就算喺街市都要靚」。輸人不輸陣，就是玲姐。食家蔡瀾在專欄不止一次提到：買雞肉，一定要去周華記；就連九龍城街市常客周潤發，亦同玲姐老友鬼鬼。2008年香港第4次殺雞，發哥專誠到街市為玲姐打氣，引來電視台追訪，其時周華記的冰鮮雞牌遲遲未批出，四萬咁口的發哥在舖位一站，牌照當日批出，引為熱話。
當年玲姐妥協兼賣冰鮮雞：「梗係活雞好食啲」。玲姐的雞年願望亦與雞有關：「最緊要梗係要多啲人食雞，生意興隆！」除了大年初一及年初三，年終無休。「年初二仲要早啲，啲人開年，冇雞食點得？」
■記者呂麗嬋