美國總統特朗普（Donald Trump）啱啱先宣誓就職，咁快就嚟咗香港？同行仲有北韓金正恩同財神爺，唔通有特別任務？
噚日下晝3點幾，3人現身中環ifc對出天橋，一字排開向前行。呢個侵侵同肥仔恩雖然係A貨，但A貨特朗普同真人相似度有九成，眼神同行路嗰份霸氣，以及真．侵侵嗰種冷面嘅神韻，都扮得相當到家。而滿口英文嘅肥仔恩都算好似，財神就係巴西歌手Chris Polanco（陳杰），仲戴黑超㖭！
當現場播出《財神到》音樂，三人邊睇貓紙邊合唱，當中以侵侵最認真，估唔到飄洋過香港，反而咁受歡迎喎。佢哋夜晚仲去咗維園年宵，其間到工黨嘅攤檔被李卓人同何秀蘭捕獲，兩人齊齊倒豎手指公，並高叫「love trumps hate」口號。