本周一晚(23日)練馬師葉楚航喺台上不斷多謝其他人，原來佢喺沙田一間酒樓搞咗個49圍嘅馬房團年晚宴，廣邀多位娛圈好友、馬圈中人及自己馬房員工齊於猴年結束前玩番晚，當然成個宴會爆晒棚，座無虛席。
期間葉楚航上台多謝太太廖偉顏一路以來默默支持，喺佢面對好多挫折時候，一直喺身邊頂住佢，可以克服困難，令人感動。其後航哥繼續說出下半季馬房大計，他說：「喺團年飯之前，我只得十幾場勝仗，但我話畀你哋聽，我下半季會好厲害，頭馬陸續有嚟。」
咁講法，下半季點可以唔留意葉楚航馬房嘅賽駒呢！而全晚最壓軸節目當然為葉楚航大開金口，化身《古惑仔》陳浩南唱出金曲《友情歲月》。航哥唱得咁高興，仲即時拉埋萬人迷嘉琦BB同幾位猛男上台獻唱《一生中最愛》，不過嘉琦BB身為女仔，自然會怕怕羞羞，成晚只喺唱咗幾句，真是可惜了。