史達寧15年由利物浦過檔曼城，做反骨仔，同義詞即係二五仔，紅軍躉或者想睇住佢變衰，之不過事實係相反囉！
22歲嘅佢家陣撈得風生水起，有報道話佢豪使310萬鎊（3,000萬港元）喺柴郡，買咗間7,500呎嘅五房豪宅。各位係咪即時諗起《嚦咕嚦咕新年財》入面，「麻雀大俠」德華媽咪話：「好在你努力讀書出人頭地，阿媽先有大屋住！」喺史達寧個case嚟講，係女友Paige同囝囝Thiago有大屋住。
不過講到肯為親人使錢嘅球星，29歲嘅美斯都係其中之一，買紅酒賀媽咪57歲生日！又要請德華媽咪出場：「阿仔，呢支『過期利賓納』幾好飲喎！」美斯仲要買咗兩支1960年同1987年嘅靚酒，總共盛惠430鎊（4,200港元），孝順程度拍得住麻雀大俠啦！