耀才證券（1428）老闆葉茂林出名多花臣，農曆新年後即有新搞作，揀定啟市吉日年初八推出「教學專車」，呢部專車有得問股票又可以開戶，形同流動證券行，似係學「流動銀行」條橋喎。流動服務係金融業新趨勢之一，渣打（2888）同滙豐過去兩年就先後推出流動銀行車，耀才竟然唔執輸。
聽講，耀才特登訂做一架同滙豐流動車差唔多大嘅貨車，內置電腦提供一對一服務，每周停泊一個固定地方，有分行職員答問題，街坊問股票兼開戶都得，運作同證券行服務無異。
耀才又介紹，專車會走遍全港不同地區，特別針對旅遊景點嘅中國旅客。不過問到專車嘅實質運作、設施同外型，公司就賣關子，話要保持神秘感，初八先公佈。
搵番舊聞，耀才早於2011年推出過「密斗車」宣傳攻勢，大貨車走遍港九旺區宣傳，車身標明低佣開戶兼送超市禮券，但後來不了了之。有本地證券行高層話，行業正向要求監管機構放行網絡開戶，如果成功，互聯網先係吸客大方向，流動證券行概念只係綽頭，估計實質效用唔大，未必成風。