美國候任財長姆欽（Steven Mnuchin）嘅鼎鼎大名經常考起外國嘅主播，有人將佢嘅猶太姓氏「Mnuchin」讀錯為「Munchin」，可能眼大睇過龍，將姓氏中嘅「n」同「u」掉轉，搞到美國新財相無端端做隻食嘢食到停唔到口嘅「大食鬼」（Munchin）。
53歲嘅姆欽上個禮拜出席參議院財務委員會嘅提名聆訊，頻頻出現喺新聞。當日有幾位議員似乎唔太識讀姆欽嘅姓氏，仲讀錯好幾次。姆欽聽到保持鎮定，冇乜反應。直至有位議員忍唔住問：「唔好意思，係咪讀錯咗你個姓？」姆欽以微笑點頭兼打完場，氣氛先冇咁尷尬咋。
姆欽有個咁特別嘅姓氏，因為佢係出於猶太人家庭，個姓氏係希伯來文而非英文，發音幾撓口。姆欽即將接任傑克盧成為美國財政部長，亦是繼魯賓同保爾森後，第三位嚟自高盛嘅美國財長。