近三戰尾場賽事，均有新勝馬跑入前兩名，至於周三晚(25日)快活谷夜賽，第九場二班1650米，只得「金滙龍華」及「開心駿馬」屬新勝馬贏完再出。
其中告東尼馬房的「開心駿馬」上仗造出1分39秒72，是今季谷草一哩最快締速，今仗抽得一檔好位，雖然雷神放棄唔騎，但改配潘頓配搭一樣咁有卡士。
睇番「開心駿馬」上仗與「萬馬飛騰」同晚不同場贏同程谷草一哩，「開心駿馬」多負五磅而總時間仍快「萬馬飛騰」百分之一秒。值得留意「開心駿馬」當晚在彎位移出三叠望空踩油發力，反觀「萬馬飛騰」整個彎位貼欄慳位，待入直路才順勢移出外欄衝，更可反映「開心駿馬」之厲害，今次「開心駿馬」只讓「萬馬飛騰」一磅，睇嚟足以再下一城。