公民黨余若薇（圖）年年喺維園寫揮春，今年原來因為跑馬仔，發生咗一件小趣事。話說有位女士要佢寫對聯，上聯「俊」字開頭，下聯則要以「華」字開首，唔知係咪日寫夜寫，寫到反應慢咗幾拍？
余大狀當時未有心領神會，點解要由呢兩粒字開頭，仲以為呢位女士家有喜事，所以同黨友集體創作兩句美言，寫「俊才振起家聲遠 華庭流芳世澤長」，寫好後呢位女士對余大狀話，留番3月有用，此時余大狀先驚覺自己蠢豬。
黨友同網友其後「詩興大發」，副主席賴仁彪提議寫「俊才無需紅綠燈 華麗轉身跑馬仔」；亦有facebook網友建議「俊傑廉悍為無為 華才不逞事無事」，佢大讚好有文采。