臨近歲晚，飲食業好忙碌，員工多勞就應多得，叙福樓集團旗下基層員工如售點、傳菜同洗碗靚姐等，本月起平均加薪6至10%，跑贏大市，仲有花紅派。
每月加多兩日假
高層職員平均加幅都有3%，集團執行董事黃傑龍（Simon，圖）話，雖然消費市道麻麻，但業績仍維持同去年相若，點都要慰勞手足，仲要肥下瘦上㖭！
Simon話基層職位好難請人，要留住好員工，人工梗係要加多啲。集團旗下日式餐廳喺新一年，員工每月仲會加多兩日假，由4日變6日，希望可以平衡員工生活，吸引年輕人入行。但中式酒樓仍維持每周返六日，Simon話始終難請人，希望遲啲可以睇齊啦。向來好多鬼馬主意嘅Simon係飲食界選委，近日喺fb搞咗個特首民調，薯片遙遙領先，Simon話任何選舉都要選大眾接受嘅領袖，民意好重要。