海洋公園呢排人流多番啲，除咗因為40周年推40蚊門票優惠，仲多咗班老友記，公園主席孔令成透露，港鐵海洋公園站通車後，長者遊人多咗達70%！梗係啦，長者可以免費去海洋公園，搭港鐵又只係兩蚊雞，識得玩梗係咁玩啦。
公園趁機推本地長者尊享優惠，持香港身份證明文件或社會福利署簽發嘅長者咭、65歲或以上市民，去公園票務處可以換取當日免費入場門票，仲可獲贈長者優惠餐飲券。
面對40蚊門票熱潮，行政總裁李繩宗話入場嘅唔少都係後生仔女，小食亭生意都好咗，整體餐飲消費有雙位數增加。佢透露暑期會出版一本專畀幼稚園學生睇嘅保育書，而威威天地正陸續翻新兒童遊樂設施，包括有城堡、畀小朋友攀爬嘅巨人森林等，所有工程9月完成。