八方相當年：
巨人梁宏正留學返港爆喊 - 李八方

身形高大細路哥，通常都會畀老師「睇中」，好似六呎二吋高嘅梁宏正Clarence、即係立法會主席梁君彥嘅公子，由於生得高加上樣子嚴肅，小學起幾乎年年獲老師揀選做班長，從中培養領導能力。

嚴父安排好shocked

38歲嘅Clarence接任經民聯青年事務委員會主席後，開始活躍於台前，呢位喇沙仔有個妹妹，佢話細個由爺爺湊大，成日兩爺孫周圍去。佢話小學時未算特別高，「但六年級升中一時，就突然飆到六呎」，透露細個讀書成績唔差，仲可以參加課外活動如童軍，升中三嗰年到英國讀書，佢話係嚴父型老竇安排嘅，想佢學識獨立，「知道要去留學後都好shocked，嗰時都冇乜choice……」
男兒有淚不輕彈，Clarence到埗住寄宿學校後冇乜唔適應，「好捱得苦」，但半年後搭飛機返嚟香港過聖誕，「飛機landing時轉彎，嗰時仲喺啟德機場，我喺窗口望到香港，即時喊咗出嚟」。
1999年喺劍橋經濟學榮譽學士畢業嘅佢，約於3、4年後獲頒碩士學位，仲喺劍橋識埋太太！當年畢業時諗過喺英國嘅國際企業做嘢，以便調返香港，適逢亞洲金融危機較難搵呢啲工，結果返港食科網熱搞公司，科網爆煲後冇做嘞，返家族公司幫手。而佢返港後亦同朋友搞慈善組織，資助山區兒童，仲不時到山區探訪。