巴塞隆拿今季一度被睇死蟬聯唔到聯賽冠軍，但最近風向又唔同晒，佢死對頭皇馬勢頭麻麻，巴塞就全面回勇，周日西甲作客伊巴，「MSN」個個有波入，以4:0大勝而回。
丹尼斯蘇亞雷斯喺開賽早段就入替受傷嘅布斯基斯，前者先開紀錄，下半場到美斯、蘇亞雷斯同尼馬輪住入波，巴塞大勝伊巴而回，近兩場聯賽加埋入九球不失一球，狀態大勇，𠵱家只係落後少踢一場嘅皇馬兩分。不過巴塞目前仲係排第三，西維爾喺周日同樣贏波守住次席。據悉布斯基斯傷勢唔輕，要休戰幾星期。
皇馬近排表現麻麻，壓力大之餘，喺上周六聯賽傷出嘅莫迪歷同馬些路，預計都要唞一個月；而手部受傷嘅基斯坦奴朗拿度，喺周三西盃八強次回合都未必出得。