「魔獸」杜奧巴雖則成38歲，不過仲有價有市，早排同中超仲有馬賽拉上關係，家陣就傾緊加盟哥連泰斯。巴西傳媒話哥連泰斯開出嘅條件相當豐厚，除咗月薪有12萬美金之外，仲幫佢喺富豪區租間屋，同埋包佢一架防彈SUV，又有六套來回巴西同歐洲嘅商務客位機票。咁都未算，如果佢攞到巴甲神射手，仲會有額外獎金。睇嚟巴西好有機會係杜奧巴職業生涯最後一站囉。