喺邊度買到廁紙、用乜嘢取代廁紙，以及點樣嘟八達通入閘搭港鐵，成為全城熱爆話題，向來鬼馬嘅大律師林作都玩埋一份，趁住同參選特首嘅退休法官胡國興會面，拍咗兩條短片，同胡官唱雙簧寸爆林鄭堅離地。
網戰越嚟越勇嘅胡官，喺其中一條短片一開波就問林作，手上攞住嗰啲係乜東東？林作就話屋企廁紙用晒，要攞啲返去用。此時胡官就問佢嘞，點解唔去買廁紙呢？冇點名道姓但肯定係針對林鄭去便利店買唔到廁紙嘅笑話啦！林作就強調，臨時臨急，屋企有急需嘛，你一言、我一語，玩謝林鄭。
「冇紙用」處境題考網民
以為咁就完？好戲在後頭！之後胡官仲同林作一齊搭港鐵，見到林作唔識用八達通入閘，胡官即時霸氣話：「唔識入閘就行開，唔好阻住我入閘，等我嚟」，然後從容不迫輕鬆過關，留低林作浮誇地狂摷佢個招牌雀巢頭。
點解胡官會同林作粉墨登場？林作話特首參選人中最撐胡官，因為同佢理念最接近，以青年人身份邀約胡官傾偈又得咗，就喺噚日朝早見面。胡官問佢點睇自己喺傳媒方面嘅表現，佢就話應該拍多啲短片，靈機一觸邀請胡官即興演出，估唔到胡官演出咁生動傑出。
查實喺見林作之前，胡官已經喺facebook出po抽水，出咗條處境題，話要考吓大家嘅應變力：如果半夜發覺無廁紙用，大家會點處理？佢好窩心列出5個答案畀大家揀，包括「用手巾仔、毛巾頂住先」、「拍鄰居門講：唔好意思，我真係好急，可唔可以……」、「如果你同鄰居關係唔多好，落樓問看更借」、「去便利店買幾包紙巾（記住唔係廁紙）」、「揸車番官邸搞掂，如果你有官邸」，嘲諷仲有好多簡單處理方法，重點係唔使返官邸。若然林鄭再有得揀，又會揀邊個呢？
李八方
mailto://[email protected]