有「懶人基金」之稱嘅強積金預設投資策略將於今年4月推出，不過好多打工仔仍然唔知係乜東東，而且強逼金一向都俾人話收費高兼回報低，唔少人已經當將筆錢倒咗落鹹水海。
滙豐作為全港最大強積金供應商，當然要幫強逼金洗一洗底。4月1號懶人基金一推出，滙豐就於2號，喺中環海濱舉行一場「滙豐強積金戶外挑戰賽」，多位高層都會落場參加。
賽事有三個組別，包括5公里、2公里個人或隊際障礙賽，同埋可以成家一齊玩嘅800米親子賽，總共有6大關卡，好似其中一關迷宮，就要參賽者答中懶人基金問題先可以逃出迷宮。贏咗最多有2,000蚊旅遊禮券，報名費100蚊，全數撥捐東華三院。
滙豐香港零售銀行及財富管理業務主管欣格雷（Greg Hingston）同退休金主管葉士奇講明，到時會落場玩，唔知靚佬CEO王冬勝到時會唔會落場跑兩轉呢？