有意參選特首選舉嘅葉劉淑儀好勤力，周圍拉票，噚日收市後，去咗同金融服務界選委會面，呢個界別有18人，個別選委暫時對葉劉印象幾好，唔排除畀票葉劉，佢哋亦偏向綑綁投票㖭呀。
噚日有12位金融界選委與葉劉會面，大約傾咗一個多小時，有份出席會議嘅包括「金牌莊家」詹培忠囝囝詹劍崙（Ricky），同埋證券商協會董事蔡思聰。
金融界偏向綑綁投票
Ricky認為，葉劉明顯係有做到功課，識點樣去處理問題，佢亦係最早喺立法會就上市架構改革，向證監會提出質詢，中小型證券行開唔到銀行戶口嘅問題，佢都話會跟進，Ricky覺得葉劉幾好，唔排除會投票畀佢。蔡思聰都話，經過初步交流，覺得葉劉認識金融市場同監管機構運作，業界熱議嘅上市改革，葉劉亦企喺業界呢邊。
不過，葉劉唔好開心住，因為金融界選委仲未同曾俊華、林鄭月娥會面，如果見埋佢哋，諗法可能有變㗎。目前金融界選委對林鄭、葉劉持開放態度，Ricky補充話，業界暫時偏向「盡量綑綁」投票，若然有大是大非嘅議題，佢有機會離隊，投自己心水人選。
講到另一位特首參選人胡國興，兩位亦分別見過，Ricky覺得胡官對於金融知識一般，好難支持；蔡思聰就認為，胡官只係不斷重複重啟政改就可以解決到經濟民生問題，似乎係too simple喎。