孖屐成日話唔夠人做上市公司獨立董事，搞到唔少退休會計師、律師成為搶手貨，好似安永會計師事務所前合夥人李港衞（Conway），佢做緊十間上市公司嘅獨董，國泰君安證券最近申請上市，佢亦幫手做獨董，真係唔知佢點分身㗎呢。
幫佢計一計數，單係呢十間上市公司嘅董事袍金，佢一年袋超過270萬人仔，平均月薪超過22萬元，呢種半退休生活都幾爽。
李港衞今年先至62歲，以今日標準算後生，佢喺安永工作29年，2009年離開，之後陸續擔任多間上市公司獨董，包括現代牧業（1117）、西藏水資源（1115）、國美電器（493）等。
睇番資料，佢算係安永內地業務嘅開荒牛，1992年開始去內地搵生意，主要做B股，仲有個朵，叫「B股王子」；之後佢專門搵內地零售民企，怪唔得佢做獨董嘅公司全部係內地企業喇。