香港騎師以雷神莫雷拉最堅，世界馬壇則以另一「莫」莫雅最強，事關這位英國猛將攞過兩屆全球最佳騎師獎，獲封天下第一高手。
這天（22日）跑沙田日馬，來港客串一天的莫雅，首匹座騎第四場四班1200米草地之「當家精選」即嚟料，這匹蔡約翰馬房服役初出馬後上大熱輕勝，單Win及組合獨贏A2分別派31及21.5元。
過去「巴基之星」專門輸在起跑線、贏在終點線，直路以天馬行空式後勁反敗為勝。而三歲澳洲自購新馬「當家精選」今次贏馬誇張程度可謂不遑多讓，沿途墮後跟住主馬群跑，轉直路彎前開始發力，並於大外叠入直路，堪稱瘋狂蝕位。
話雖如此，此駒在最後200米左右使出巨大步幅及衝刺力，於外欄一衝過晒，完全當對手唔係馬，最終反勝兩又四分一馬位先過終點，以一種完全超班的姿態打響出賽頭炮，亦令莫雅重臨客串首場上陣即贏。
連同第二場由雷神贏「開心遊戲」，話咁快蔡約翰又起孖，佢已經連勝六次賽事未斷纜，頭馬增至37場，進一步領先排行第二的大摩至六Win。
第四場二至四名順序為「勁有波幅」、「全勝姿態」及「辣辣椒」，其中「勁有波幅」初配雷神跑盡只得第二，未能重響勝鼓，但與「當家精選」包辦連贏，卻令今場開出雙莫Q，四重彩派5,054元。