【本報訊】稱要與香港人「一生一世」的貴價茶餐廳翠華（1314），近年負評如潮，有人說它轉攻自由行，與港人越走越遠，質素下降又不斷加價。剛入局董事會的翠華太子爺李祉鍵，坦承翠華「之前做得好不足」，會接受香港人的「負皮」，冀趁今年成立50周年作改變，做番香港人的翠華。
記者：范穎琛 方楚茵
翠華近年業績大倒退，去年多名創辦股東更爆爭權，將不和「擺上枱面」，賣盤「話賣唔賣」，這亂局最終由主席李遠康向其他創辦人購入少量持股，再安排其子李祉鍵加入董事局後，暫告結束。
過去20個月無加價
面對外間批評，李祉鍵卻正能量滿身：「唔怕客人畀意見，佢畀意見係因為佢仲care，唔care可以走咗去。」那是否一如網民所言，過去自由行好景時太依賴內地客，忽略了本地需要？「唔係嘅，每個階段有不同需求，但今年重點是改善之前做得不足的地方」。
要拉近翠華與香港人的距離，免不了要處理其被轟「離地」的價格問題。一個招牌奶油豬由2012年上市時賣16元，四年來累加25%至現時20元；一杯熱奶茶盛惠20大元，簡單午餐隨時索價80元。李祉鍵堅持翠華是與香港人「風雨同路」，強調過去20個月已無加過價，全因睇到香港近兩年經濟起伏不定：「想同香港人一齊奮鬥，同香港步伐一致」。
至於現價是否過高、有否減價空間，李祉鍵就沒正面回應，僅稱已從份量着手回饋客人。「好似裝熱檸茶、魚蛋粉嘅器皿，已換咗新裝，容量比以前更大，希望在產品上滿足大家」。惟目前只有少量產品及新店有用加大份量的器皿，翠華指其後會逐步更換。
擬推「港人情感菜式」
另一李祉鍵認為能吸引香港客回流的元素，是人情味。「好似細個去茶餐廳入門口已有伙記嗌『阿李生』，A餐、凍檸茶，坐低食物好快擺晒出嚟，好似返咗屋企咁，想將這種文化重新在翠華帶出來」。然而，昔日人情味濃的小店，已膨脹成今日在中港擁60間分店的連鎖集團，如何回到當時？李祉鍵強調，「中環分店好多老顧客，打牙骹的文化依然存在」，而走入新區，客人都接受翠華，因為「係好貼地的香港文化，食個菠蘿包都係7、8蚊，係普通消費」。他又稱，下半年會推出一些「同香港人有情感嘅菜式」，「好多茶餐廳產品已一段時間無咗，我們目前研發緊」。
李祉鍵指今年會在港開三至四間新店，住宅旺區同時發展，攻入新區時會按消費能力調整價格，旺區則因有遊客「揸（旅遊）書仔」到翠華搵食，繼續有支持。
李祉鍵承認過去數年香港服務、管理上步伐放慢：「之前真係做得好不足，希望不久會做番啲同香港人貼近嘅嘢。」那是否不再賣盤了？他輕輕「嗯」了一聲默認，重申翠華上市真正目的是要透明化，「畀公眾監察，持續發展」。
【市民意見】
黃先生： 「N年前食過翠華，但𠵱家質素無以前咁好，可能上咗市後質素差咗啲，對比其他茶餐廳貴，所以少啲幫襯。（份量加大會否多啲幫襯？）𠵱家唔係大份細份問題。」
童先生：「食過一次翠華，普通，感覺有一半食緊舖租。（份量加大會否多啲幫襯？）唔會太吸引，因為𠵱家份量其實都OK㗎，係價錢問題，唔太關份量事。」
孫女士： 「我自己就覺得翠華都好好食，又方便，但係有時都會覺得翠華啲午餐太貴。（份量加大會否多啲幫襯？）會啊，OK㗎，其實翠華都幾好，起碼坐得舒服。」
【網民洗版】
Edmond Chow：
「你間嘢，係茶記已經算貴啦，十枱有九枱都係大陸人，𠵱家無咁多大陸人嚟，生意差咗又話要同港人風雨同路，咁你減價先啦，我都諗唔起有幾多年都無去翠華食嘢。」
So Chi：
「好耐冇去過翠華。連鎖店講乜人情味？嘥氣！」
Chun Wai Raymond Ng：
「我自問就食唔起啦！寧願去啲舊式茶餐廳。」
資料來源：《蘋果日報》fb專頁