一連六日嘅維園年宵噚日開鑼，唔少政黨都投咗個檔口，賣年宵產品之餘又趁機會宣揚政治理念。3月中就係特首選舉，所以今年唔少檔口都以特首跑馬仔為主題，但年宵產品幾生鬼都係死物，有乜惹火得過搵個特首參選人睇檔吖？噚日新民黨葉劉淑儀就為該黨年宵攤位開檔，黨友田北辰仲以雞為喻力撐㖭。
新民黨嘅攤位產品其實冇乜特別，大大小小嘅雞公仔，應吓節，但田北辰介紹一籃3隻小雞時，就話係「建制一籃子雞」，又話雞有兩個特點，一係求生意志強，不易妥協，你要阻佢前進都唔係易事；第二係教會大家唔好將所有雞蛋放喺同一個籃，因為雞蛋好脆弱，你以為個籃子無堅不摧，但世事難料，「好似梁振英唔競逐連任，都冇人估到」。
袋巾「欽點」葉劉
新民黨行前幾步就到公民黨，年宵產品花款相對較多，主席梁家傑用上三寸不爛之舌力銷產品，為咗搞氣氛，即場轉動印有幾名參選人頭像嘅轉盤，點知轉中葉劉做下屆特首，袋巾笑言：「都冇用，我哋有得揀咩？佢都唔夠票入閘啦。」公民黨年宵產品包括迷你紅綠燈，附送象徵特首候選人嘅貼紙，寸爆中央操控特首選舉，盛惠68蚊。
民主黨過去幾年嘅產品貴精不貴多，今年主打「勁共勁共飛行棋」同「魚蝦蟹倒特首」，99蚊可以帶佢走，存貨得1,000盒，八方聽講噚日開檔3個鐘已賣出100盒。而出名做道具手工一流嘅社民連，今年攤位依然搶眼，薯片叔、奶媽同葉劉爭相「舞龍」咁款，而條龍正在「採青」舐鞋底，另外仲有3個巨型紙牌公仔作招徠，分別係「守財奴曾俊華」、「你呃人梁振英」同「狼英翻版林鄭月娥」。
義賣DQ曲奇籌訟費
社民連仲有賣價值180蚊嘅長毛牌午餐肉攬枕，意念來自長毛被民建聯陳恆鑌掟午餐肉事件；又將長毛口頭禪「喂阿哥」、「嘥時間」等製成膠紙，仲有仿照警方封鎖膠帶製成嘅藍白色市民封鎖線膠紙，上面寫上「市民防線，不得越過」字句，膠紙每卷20蚊，兩卷售30元。
香港眾志嘅年宵則預備咗500包手工曲奇義賣，每包200蚊，收入會捐助「守護公義基金」作為4個被政府提司法覆核DQ議員嘅訟費，呢4位受打壓者包括長毛、羅冠聰、劉小麗同姚松炎，以及基金發起人之一嘅陳健民噚日都有助陣，陳健民透露基金要籌募嘅經費由原來500萬，增至1,000萬。
李八方
mailto:[email protected]