臨近農曆新年，又係企業舉行春茗旺季，一向豪爽嘅耀才（1428）主席葉茂林，上周六喺公司周年晚宴，就豪派30萬銀現金，相信員工應該好滿意。不過下月底先至離職嘅郭思治（郭sir），當晚就唔見人喎。
耀才前晚喺銅鑼灣一間酒樓大排筵席26圍，招呼超過300位員工，每人入場已先袋500蚊利是，一如往年，玩過遊戲抽晒機票、iPhone等獎品後，員工起哄要求老闆葉茂林加碼，結果無獎品嘅幾乎每人再得500蚊現金獎，每人至少千元落袋，計落淨現金都大約派咗30萬銀。
2月28日離職嘅郭sir，呢晚就冇現身，得番行政總裁許繹彬傍住葉茂林敬酒，據講郭sir以事忙為由，拒絕耀才邀請，理由都係嗰句：要多啲時間陪屋企人。