今期港交所（388）行政總裁李小加應該最想林鄭做特首，事關林鄭日前無端端鬧香港金融官員，見阿里巴巴放棄來港上市都唔做檢討，搞到香港落後於形勢，李小加一路爭取遷就阿里，以「同股不同權」方式來港上市，仲唔係最開心？
喺金融服務界得票最多嘅選委詹劍崙，對於林鄭未搞清楚阿里上市風波嘅來龍去脈，就作出批評，不以為然，估計林鄭可能為插薯片叔而插。佢反而關心，林鄭會搵邊個財金界軍師幫手。例如林鄭嘅競選辦主任陳智思出身金融世家，Ricky都認為佢未夠班。
Ricky講到明，自己既然係金融服務界選委，參選人對金融議題係咪認識，肯定佔一半因素，如果有參選人話明自己唔識金融，就好有保留囉。
立法會金融服務界議員張華峰，就答得非常有智慧，指林鄭可能處理太多其他事，所以對金融界議題就唔係太熟悉囉，順便又提一提佢，阿里事件並非財金官員說了算，市場意見都好緊要㗎。