澳門賭業猛人周焯華（洗米華）旗下嘅太陽集團前晚喺尖沙嘴麗思卡爾頓酒店搞周年晚宴，太陽娛樂嘅負責人黃柏高、旗下歌星許志安、林小明同盧惠光等都有出席，而全場最矚目當然係洗米華同洗米嫂陳慧玲（Heidi）一齊以主人家身份出席，洗米嫂着咗一條好貴氣嘅黑色deep V晚裝裙，同大仔周柏豪、大女Virginia、細女Damiana齊齊現身，據現場人爆料說：「華哥同Heidi關係好好，全程佢哋都係孖公仔咁全場飛敬酒，感覺一啲都唔似要離婚。」洗米嫂噚日仲喺Ig晒溫馨全家福㖭。
有望復合
洗米嫂單方面要求離婚，𠵱家分緊居，由於洗米華唔肯簽紙離婚，所以最快都要等兩年，睇嚟洗米華就係想趁呢兩年時間盡力挽回老婆芳心，睇近期佢哋出現公開場合嘅態度，關係比之前好好多，似乎洗米嫂個心係放軟咗。不過據洗米嫂身邊啲閨蜜講，洗米嫂𠵱家仲未有打算同老公復合，因為Mandy Lieu始終係佢哋兩夫妻條刺，呢個問題一日唔解決，真係好難再喺返埋一齊。