難得唔喺風眼中心，梁特樂得清閒，最近由調理農務轉至視察水產養殖，喺「梁粉」局長食物及衞生局局長高永文及立法會漁農界議員何俊賢，以及香港漁民團體聯會主席張少強陪同下，到大嶼山一個養殖白花魚嘅魚排參觀。
原來場內嘅白花魚主要用嚟收採魚鰾，製成白花膠，並混養石斑同黃鱲䱽，以便有效利用成個水體養殖。梁特話喎，「鮑參翅肚」中嘅肚亦名花膠，係魚嘅鰾，傳統智慧相信除咗味道好、還對身體好，當中尤以白花膠最為珍貴。
佢話呢個位於芝麻灣半島北部長沙灣嘅養殖場2014年組成，成員包括受禁止拖網捕魚措施影響嘅漁民，指佢喺2013年嘅《施政報告》提出成立5億元「漁業持續發展基金」，養殖場就透過申請基金資助，首次喺香港採用由海面延伸至海床嘅網箱技術養殖，重申好支持漁業發展，hardsell一番。