周三（25日）快活谷有場二班1650米賽事，有唔少近績好嘅馬列陣，好似「金滙龍華」、「開心駿馬」都係新勝同程，而榮智健愛駒「東方快車」就初跑快活谷，對手大大減弱，估計會受到注目。
「東方快車」曾由雷神莫雷拉騎過4次全上名，此駒亦係今季國際三級賽婦女銀袋賽季軍，只輸唔夠一馬位，今次跑普通谷草二班賽，毋須負頂磅，可以話頗具優勢，但偏偏雷神唔騎，咁代表啲乜呢？其實好簡單，咪就係雷神有其他更佳選擇囉！
原來雷神呢場已落實為「萬馬飛騰」操刀，「東方快車」就會配蘇兆輝。睇番「萬馬飛騰」，係少數毛色為黑色嘅純種馬，前仗同程谷草一哩，由雷神大勝對手三馬位，實力有幾強大家有目共睹，亦證明人馬合拍。
再推前到季初，「萬馬飛騰」曾與絕世好馬「巴基之星」串Q，早就證明有二班可勝之質，所以雷神揀「萬馬飛騰」而放棄「東方快車」，都算合理做法。