是夜，同渾號「股神」的友人吃飯，問他有沒有心水冧把推介，他即一臉「講呢啲」表情，然後陰陰嘴笑：「短線可以買700，不過你咪誤會，我唔係講QQ，我講嘅係選特首。」我一臉茫然。
股神呷一大口啤酒，慢條斯理解釋：「特首跑馬仔同炒股咪一×樣，唱通街嘅消息梗係大戶用嚟引你入局㗎啦。」
「即係話，唔應該買林鄭？」
他說：「少年，妖股有妖股嘅炒法，好似嗰隻566，你識玩，一樣可以食到好飽，唔識又學人玩，咪抵你死囉。假消息都係消息，點解唔順勢炒返轉先？不過咁，上車快，落車要更快，否則潮退嘅時候，你就會露械。」
我說：「受教了。咁今次大戶想點玩呢？」
股神冷笑一聲，說：「畀你估到，咁佢就唔係大戶啦。我自己就唔信消息，不過信邪。家陣畀市場力捧嗰隻700──你明㗎，中聯辦話今次目標係700票吖嘛──佢呢頭宣佈參選，嗰頭即刻就去殯儀館，仲要去錯添，呢個仲唔係凶兆？即係話佢去送死、上錯車囉。仲有，搭地鐵唔識入閘，要人教要人幫先入得到，同佢參選一模一樣，上帝已經啟示到出晒面啦，如果你咁都唔信神，我真係無說話好講囉。」
他再飲一啖啤酒，然後總結：「炒股唔一定要聽消息嘅，都可以睇返基本因素。689畀大戶瘋狂拋售，股價同佢之前間DTZ一樣直插無水花，跌到去零，點解呢？因為個個投資者都唱『ABC』吖嘛。咁啱得咁橋，呢隻700又fit得落『ABC』喎，anyone but Carrie，係咪先？佢仲要連幕後班底、路線，都話延續嗰隻牆紙股689，咁已經死路一條啦。衰開有條路呀，識炒股梗係莫買當頭跌。不過咁，深插一棍之前，實會升一浸畀你，因為唔升又點會跌呢？另一隻狂升之前，亦會畀大戶質落去，唔跌又點會升呀？但你記住，無論升邊隻，大戶都係最後贏家。」