舉起南球盃獎盃，戴住金牌，24歲嘅查比高恩斯門將福爾曼忍住眼淚，皺住眉頭，接受球迷掌聲。當大家嘅目光由佢雄壯嘅上身往下掃，就見到呢位正值盛年、本應喺門前高接低擋嘅好球員坐住輪椅；再望落去，令人更心傷，佢嘅右腳已經冇咗。一場空難，葬送咗多少大好男兒嘅生命，好彩執番條命嘅，亦再唔能夠繼續喺球迷面前踢波。
截肢門將代表領獎盃
查比上周六舉行空難後首場比賽，佢哋喺主場對巴甲冠軍彭美拉斯。賽前，阿倫路舒曹、希里奧尼圖同埋福爾曼三位喺空難中倖存嘅球員出席悼念儀式，同埋接受南球盃冠軍，其中福爾曼右腳傷勢太重，接受咗截肢手術，只能坐喺輪椅上捧盃；至於死去嘅球員，就由家屬代領金牌，場面非常感人。
儀式後，由青年軍同埋外借球員組成嘅查比就同彭美拉斯比賽，最後兩隊踢成2:2。查比喺舊年11月底出發去哥倫比亞踢南球盃決賽首回合嗰陣遇上空難，19個球員逝世；其後南美足協將冠軍頒予查比。